Ақтөбе тұрғындары мемлекеттік сатып алудан ақша табуға тырысып, 100 млн теңгеден астам қаражат жоғалтқанын хабарлады. Инвестициялық схеманы оларға тендерлік мектепте оқығаннан кейін ұсынған, деп хабарлайды Sayasatlive.kz.
Зардап шеккендердің айтуынша, алдымен оларға мемлекеттік сатып алуларға қатысуды және тендерлерді жеңіп алуды үйреткен. Содан кейін оқушыларға мектептің басқа түлектері алған тапсырыстарды орындауға ақша салуды ұсынған. Ұйымдастырушылар бастауыш өнім берушілерде қажетті тауарларды сатып алуға әрдайым қаражат бола бермейтінін түсіндірген. Инвесторларға лотты төлеуді ұсынып, одан кейін бірнеше ай ішінде сыйақы төлеуге уәде берген.
«Басындағы шарт – біз оқушы болуымыз керек. Тек оқушылар ғана инвестиция сала алады. Ол мұның бәрін Instagram-да көрсетеді, оның аудиториясы өте үлкен. Осылайша ақша табуға болатынын көрсетеді: яғни инвестиция тартасың, ақша бересің, ештеңе істемейсің. Басқа оқушы соның игілігі үшін жұмыс істейді, ал сен үстінен сыйақы аласың», – деді Айман Шуриева.
Ақтөбеліктер ірі сомаларды берген. Алайда, зардап шеккендердің айтуынша, олар уәде етілген табысты да, салынған қаражатты да алмаған. Олардың есебінше, жалпы зиян 100 млн теңгеден асты. Полицияға жеті адам арызбен жүгінді. Күдікті үйқамаққа жіберілді, алайда зардап шеккендер оны қамауға алуды талап етеді. Олар ер адамның ақша тартуды жалғастырып, қылмыстық іске қатысушыларға ықпал етуі мүмкін деп қауіптенеді.
«Инвестициялық қызметті жүзеге асыру сылтауымен, алдау арқылы олардың ақшалай қаражатын иемденген 33 жастағы жергілікті тұрғынға қатысты арызбен қаланың жеті тұрғыны жүгінді. Аталған факті бойынша қылмыстық іс тіркелді», – деп хабарлады Ақтөбе облысы полиция департаменті. Іс бойынша сотқа дейінгі тергеу жүргізілуде. Полиция басқа мәліметтерді әзірге жариялаған жоқ.
