«Қазгидромет» қазақстандықтарды қалалардағы тұман туралы ескертті. 6 қыркүйекте Астана, Алматы, Теміртау, Қарағанды қалаларында, түнде Жезқазған, Өскемен, Семей, Ақтөбе, Атырау қалаларында ауаның қолайсыз метеорологиялық ластану жағдайлары күтіледі, деп Sayasatlive.kz «Қазгидрометке» сілтеме жасап хабарлайды.
Қолайсыз метеожағдайлар (ҚМЖ) – атмосфералық ауаның жер бетіндегі қабатында зиянды (ластаушы) заттардың жиналуына ықпал ететін қысқа мерзімді метеорологиялық факторлардың (тымық, әлсіз жел, тұман, инверсия) үйлесімі. ҚМЖ туындаған кезде елді мекендердегі атмосфералық ауа сапасы нашарлауы мүмкін. Ластану деңгейінің қалыптасуын анықтайтын маңызды факторлардың бірі – синоптикалық жағдайдың (жел, шөгінділер, ылғалдылық, ауа температурасы) болжамы.
Қолайсыз метеожағдайларда мыналар ұсынылады: ашық ауада болу уақытын қысқарту, әсіресе автотрассаларға немесе басқа ластану көздеріне жақын жерде; балалар мен жүкті әйелдер ұзақ серуендеуден бас тартуы керек; өкпе, жүрек-қан тамырлары, аллергиялық аурулармен ауыратын адамдар ашық ауада болған кезде дәрілік заттарды жанында ұстауы қажет; ашық ауадағы физикалық жүктемені, дене шынықтыру және спортпен шұғылдануды шектеу, оларды жабық спорт кешендерінде өткізген жөн.
