«Қазгидромет» 11 тамызда Алматы, Ақтөбе және Өскеменде қолайсыз метеорологиялық жағдайлар күтілетінін мәлімдеді, деп хабарлайды Sayasatlive.kz.
Синоптиктердің дерегінше, бұл қалаларда ҚМЖ болжанады. Мамандар қолайсыз метеожағдайлар желсіздік, әлсіз жел, тұман және температуралық инверсия үйлескенде туындайтынын түсіндіреді. Нәтижесінде ластаушы заттар атмосфераның жер беті қабатында жиналып, ауа сапасының нашарлауына әкеледі.
Мұндай кезеңдерде ластанған ауаның денсаулыққа, әсіресе созылмалы аурулары бар адамдарға теріс әсер ету қаупі артады. Ауаның ластану деңгейіне желдің жылдамдығы, жауын-шашын, ылғалдылық және ауа температурасы әсер етеді. Тұрғындарға далада, әсіресе автожолдар мен басқа да ластау көздерінің жанында болу уақытын қысқарту ұсынылады. Балалар мен жүкті әйелдерге ұзақ серуендеуден бас тартуға кеңес беріледі.
Тыныс алу және жүрек-қан тамырлары жүйесі аурулары бар адамдарға, сондай-ақ аллергиясы бар адамдарға қажетті дәрі-дәрмектерді жанында ұстау ұсынылады. Мамандар ашық ауадағы дене белсенділігін шектеуге және мүмкіндігінше жабық үй-жайларға ауыстыруға кеңес береді.
