Қазақстанның Қаржы мониторингі агенттігі (ҚМА) «Маха.dxb» бүркеншік атымен танымал 26 жастағы Өзбекстан азаматы, блогер Махмуд Хикматовқа халықаралық іздеу жариялады, деп хабарлайды Sayasatlive.kz.
Сот оған қатысты «қамауда ұстау» түріндегі бұлтартпау шарасын санкциялады. ҚМА «Қазақстанда заңсыз интернет-казино интерфейсін ұсыну, ақша қаражатын қабылдау және төлеу (эквайринг, мобильді коммерция, криптовалюта), ел азаматтары арасынан ойыншылардың көп санын тарту мақсатында жарнама жасау бойынша тұрақты сұлба жұмыс істегенін» хабарлады.
Ведомство дерегі бойынша, Хикматов SultanGames, PINCO, Nomadcasino, Pin-Up, Vavada және т.б. заңсыз интернет-казиноларды насихаттады деген күдікке ілінді. Ол үшін ұйымдастырушылар оған Қазақстан аумағында жарнамалық контент орналастыру үшін инфлюенсерлерді тарту рөлін берген. Тергеу нұсқасы бойынша, Хикматов блогерлерден олардың әлеуметтік желілерінің статистикалық деректерін, соның ішінде демографияны, жазылушылардың географиясын, сондай-ақ аудиторияны қамту көрсеткіштерін сұраған, соның негізінде жарнамалық қызметтердің құны анықталған. Ол барлығы 35-тен астам блогерді, оның ішінде блогер Қайсар Қамзаны тартқан.
ҚМА оның кең аудиториясы бола тұра, «Қазақстан Республикасының азаматтарын тыйым салынған құмар ойын қызметіне қатысуға қасақана тартқанын, интернет-казиноларға рефералдық сілтемелер орналастырып, пайдаланушылардың әрбір өтуі үшін сыйақы алғанын» еске салды. Тергеу аясында ол 6 тамызда Вьетнамнан Қазақстанға экстрадицияланды. Қаржы мониторингі агенттігі Хикматовтың орналасқан жері туралы білетін азаматтарды бұл туралы сыйақы үшін хабарлауға шақырды. Анонимдікке кепілдік беріледі.
