Түркістанда Қазақстан мен Өзбекстан арасындағы су саласындағы екіжақты ынтымақтастықты тереңдетуге арналған Бірлескен жұмыс тобының 14-ші отырысы өтті, деп хабарлайды Sayasatlive.kz.
Кездесуді ҚР Су ресурстары және ирригация министрі Нұржан Нұржігітов пен ӨР Су шаруашылығы министрі Шавкат Хамраев өткізді. Кездесудің басты қорытындысы трансшекаралық су объектілерін бірлесіп басқару және ұтымды пайдалану туралы Келісімді ратификациялауды талқылау болды. Тараптар мемлекетаралық өзара іс-қимылды жаңа деңгейге көтеретін жаңа тұрақты жұмыс істейтін Қазақстан-Өзбекстан бірлескен комиссиясы туралы ереженің жобасын қарастырды.
Қатысушылар саланың цифрландырылуына баса назар аударды. Сарапшылар Сырдария алабындағы гидробекеттерді автоматтандыру барысын бағалап, бұл технологияны кеңейту туралы келісті. Халықаралық қаржы институттарының қолдауымен тараптар 10 негізгі гидробекетті – әр мемлекеттің аумағында 5-тен – автоматтандырады. Бұл жаңашылдық суды ашық есепке алуды, көрсеткіштерді жедел онлайн-беруді және ортақ деректер базасын қалыптастыруды қамтамасыз етеді.
Келіссөздер соңында тараптар жұмыс тобының келесі, 15-ші отырысын Өзбекстан аумағында өткізуге келісті.
«Біздің ынтымақтастығымыздың екіжақты форматы су шаруашылығындағы өзара іс-қимылдың нақты мәселелерін жедел шешуге мүмкіндік беретін тиімді пәндік механизм ретінде өзін көрсетті. Қазақстан Республикасы Үкіметі мен Өзбекстан Республикасы Үкіметі арасындағы трансшекаралық су объектілерін бірлесіп басқару және ұтымды пайдалану туралы Келісімнің екі тараптан да ратификацияланғанын ерекше атап өткім келеді. Бұл – біздің одан арғы жұмысымыз үшін, соның ішінде бүгінгі күн тәртібінде тұрған мәселелер бойынша жаңа құқықтық негіз қалыптастыратын маңызды қадам», — деді ҚР Су ресурстары және ирригация министрі Нұржан Нұржігітов.
Орталық Азия елдері Сырдария алабындағы су есебін автоматтандыруға келісті.
