Ақтаудағы «Рахат-2» тұрғын үй кешенінің тұрғындары қатты ыстық кезеңінде электр жарығының жиі өшірілуіне шағымданды. Жарық үзілістерінен үйлерде су да жоғалып, лифтілер жұмыс істемей қалады, деп хабарлайды Sayasatlive.kz.
Тұрғындардың айтуынша, ішкі желілер жоғары жүктемені көтере алмайды, ал үздіксіз электрмен жабдықтауды қамтамасыз етуі тиіс резервтік кәбіл әлі күнге дейін тартылмаған. Тұрғын үй кешенінде шамамен 1,5 мың адам тұратын 800-ге жуық пәтер бар. Олардың арасында балалар мен қарт адамдар да бар. Электр жарығы өшкен кезде жоғарғы қабаттардың тұрғындарына лифтілер жұмыс істемейтіндіктен жаяу көтерілуге тура келеді.
«Егер жарық өшсе, бізде су болмайды. Себебі қазір барлық көпқабатты үйлерде су насостар арқылы беріледі. Ал электр жарығының болмауына байланысты су беру тоқтайды. Жоғарғы қабаттар сусыз қалады. Ең бірінші өтініш: электр жарығы мәселесін реттеңіздер», – деді тұрғын үй кешенінің тұрғыны Асыл Алдабергенқызы.
Қызмет көрсетуші компания үзілістер жаз басталғаннан бері басталғанын хабарлады. Кернеудің секіруінен төрт насос істен шыққан.
«Жаз басталғаннан кейін электр жарығы үнемі өшіп қалады. Ауыз су насостары жұмыс істемей қалады. Содан кейін лифтілер тоқтайды. Жаз басталғаннан бері осы өшірулерге байланысты бізде төрт насос жанып кетті. Біз оларды жөндеп, қайта орнатамыз. Бірақ егер бұл жалғаса берсе, барлық жабдық істен шығады», – деді қызмет көрсетуші компанияның басшысы Меруерт Көшербаева.
Тұрғындардың айтуынша, төрт жыл бұрын үйді тапсырған құрылыс салушы әлі күнге дейін қажетті құжаттарды электрмен жабдықтаушы ұйымға бермеген. Осыған байланысты желілер иесіз болып саналады. Тұрғындар құзырлы органдарға ұжымдық өтініш жолдаған, алайда мәселе әлі шешілмеген. Ақтау әкімдігі электр жарығының өшірілуінің негізгі себебі ретінде электр желісіне түсетін шамадан тыс жүктемені атады. Үйлерді ең жоғары сағаттарда электрмен қамтамасыз ету үшін резервтік кәбіл қажет, бірақ ол жоқ.
«Құрылыс ұйымы өз уақытында екі кәбіл тартуы керек еді. Алайда бүгінгі күні мұнда тек біреуі бар. Яғни резервтік кәбіл жоқ. Сондықтан өшіру болған жағдайда қалпына келтіру жұмыстары белгілі бір уақытты алады. Кәбіл желілері қазірдің өзінде сатып алынған. Қала бойынша кезектілікке сәйкес оларды тарту жұмыстары жүргізілуде», – деді Ақтау қалалық ТКШ бөлімінің бас маманы Әсет Баспаев.
Әкімдікте жұмыстардың нақты аяқталу мерзімін атамады. Бұл ретте шенеуніктер кәбіл тартуды бір апта ішінде бастауға уәде берді.
