Сейсенбі, 28 шілдеде Дүниежүзілік гепатитпен күрес күні атап өтілді, деп хабарлайды Sayasatlive.kz.
Жыл сайын 28 шілдеде бүкіл әлемде Халықаралық гепатитпен күрес күні атап өтіледі. Бұл күн вирусты ашқан, Нобель сыйлығының лауреаты Барух Бламбергтің құрметіне белгіленді. Ол 28 шілдеде дүниеге келген. Алғашқы мереке 2008 жылы өтті. Іс-шараның бастамашысы осы аурумен күресетін дүниежүзілік ұйым болды. Үш жылдан кейін Дүниежүзілік денсаулық сақтау ұйымы (ДДҰ) бұл күнді өз күнтізбесіне енгізді, соның арқасында дата ресми мәртебеге ие болды.
Жыл сайын 28 шілдеде ДДҰ әлемнің түкпір-түкпіріндегі медицина қызметкерлеріне гепатит және оның тудыратын дерттері туралы қоғамға айтып, ағартушылық сипаттағы акциялар ұйымдастыруға кеңес береді. Диагностика, вакцинация және т.б. сияқты алдын алу шаралары да маңызды. Гепатит вирусы адам денсаулығы үшін негізгі қауіп факторларының бірі. ДДҰ мәліметінше, бұл ауру бүкіл әлемде 2 миллиардқа жуық адамды, яғни Жердегі әрбір үшінші азаматты зақымдаған.
Кейбір мемлекеттерде А гепатитімен тұрғындардың көпшілігі ауырған, ал кейбір адамдар В және С топтарының гепатит тасымалдаушысы. Гепатитпен күрес күніне орай өткізілетін іс-шаралар аясында қоғамға алдын алу шараларының маңыздылығы туралы айтылады, осы ауруға қатысты пайдалы ақпарат беріледі, жұқтыру қаупін арттыратын мінез-құлықтан сақтандырылады.
Сонымен қатар, бұл мерекенің үш дана маймыл түріндегі өзіндік символы және сәйкес ұраны бар: «ешнәрсе көрмеймін, ешнәрсе естімеймін, ешнәрсе айтпаймын». Жыл сайынғы іс-шараларды өткізу ең алдымен қоғам мен медицина қызметкерлерінің осы мәселеге қызығушылығын, әр мемлекет тұрғындарының алдын алу шараларын іске асыруға назарын аударуға бағытталған.
Әрбір азаматтың гигиеналық дағдыларды практикалық тәжірибеде қолдануы, алдын алудың маңыздылығын тануы және екпе іс-шараларын ұйымдастыруға қатысуы тек жекелеген елдердің ғана емес, сонымен қатар Жер халқының денсаулығын сақтауға көмектеседі.
