Мобильді аударымдарды тексеру нәтижесінде 17 мың қазақстандық жеке кәсіпкер болып тіркелді. Мемлекеттік кірістер комитеті 115 мың қазақстандыққа мобильді аударымдарды тексеру қорытындысы бойынша лимиттен асып кету туралы хабарлама жіберді. Олардың 17 мыңы осыдан кейін ресми түрде кәсіпкер ретінде тіркелді, деп хабарлайды Sayasatlive.kz.
Салық органдарында күдік тудыратын жағдай – қатарынан үш ай бойы ай сайын 100-ден астам түрлі тұлғадан 12 ең төменгі жалақыдан (шамамен 1 млн теңге) асатын сомаға аударымдардың болуы. Жалпы, осындай тексерулердің қорытындысы бойынша қазіргі уақытта жасырын кәсіпкерлік қызмет жүргізуге күдік тудырған 115 мың жеке тұлғаға хабарлама жіберілді. Олардың 17 мыңы хабарламалар бойынша түсініктеме беріп, жеке кәсіпкер ретінде тіркелді. Бұл ретте салық органдары банк аударымдары туралы деректерді салыстыру қорытындысы бойынша хабарламаның өзі адамның салықтық тексеруге іліккенін білдірмейтінін атап өтті.
Хабарламаның мақсаты – жеке тұлғаларға жағдайды түсіндіруге және қажет болған жағдайда кәсіпкерлік қызметті белгіленген тәртіппен тіркеуге мүмкіндік беру. Тексерулердің өзі күдікке іліккен тұлғалар табыс декларациясын тапсырғаннан кейін ғана басталады. Осы шақта белгіленген критерийлерге сәйкес келетін жеке тұлғаларға қатысты әкімшілік ықпал ету, өндіріп алу немесе өзге де шектеуіш шаралар қолданылмайды.
