Апелляциялық сот эко-белсенді Аруна Ортаеваны әкімшілік қамауда қалдырды. Алматы қалалық соты эко-белсенді Аруна Ортаеваға қатысты Әкімшілік құқық бұзушылық туралы кодекстің 667-бабының 1-бөлігі бойынша 15 тәулікке қамауға алу туралы бұрынғы қаулыны өзгеріссіз қалдырды, деп хабарлайды Sayasatlive.kz.
Сенбі күні эко-белсендінің үйінде тінту жүргізіліп, одан кейін полицияға жеткізілді. Онда оған Қылмыстық кодекстің 148-бабы (хат-хабарлар, телефон арқылы сөйлесулер, пошта, телеграф немесе өзге де хабарламалар құпиясын заңсыз бұзу) бойынша қорғау құқығы бар куәгер мәртебесі берілді. Бұл бап бойынша жаза 2 000 АЕК (8 млн 650 мың теңге) мөлшеріндегі айыппұлдан бес жылға дейін бас бостандығынан айыруға дейін болуы мүмкін.
ӘҚБтК-нің 667-бабының 1-бөлігі – құқық қорғау немесе арнайы мемлекеттік орган қызметкерінің заңды өкіміне немесе талабына бағынбау, олардың заңды қызметіне кедергі келтіру, былапыт сөз айту, құрметсіздік көрсету, әдепсіз мінез-құлық, арандатушылық түрінде көрініс табуы – 30 АЕК мөлшерінде айыппұл салуға немесе 15 тәулікке дейін әкімшілік қамауға әкеп соғады. Көк-Жайлау қонысында тау шаңғысы курортын салуға қарсы шыққан Аруна Ортаева Instagram-да дыбыс жазбаларын жариялады. Онда әкімдік қызметкерлері жұмыс кеңесінде Қызыл кітапқа енген Сиверс алма ағаштарын қалай жоюға және Көк-Жайлауға жол салу үшін оларды қалай кесуге болатынын, сондай-ақ қоғамдық тыңдауларды қалай дұрыс өткізу керектігін талқылап жатқан болуы мүмкін.
Адам құқықтары жөніндегі Қазақстандық халықаралық бюросы бұл іс «көрінеу жалған ақпарат тарату» бабы бойынша қозғалмағандықтан, отырыс шынымен болған болуы мүмкін екенін атап өтті.
