TikTok және оның қытайлық аналық компаниясы ByteDance АҚШ билігімен балалардың жеке деректерін қорғау ісі бойынша дауды реттеу аясында 400 млн доллар төлеуге келісті, деп хабарлайды Sayasatlive.kz.
АҚШ Әділет министрлігі TikTok пен ByteDance-қа қарсы талап арызды 2024 жылы берген болатын. Компаниялар 13 жасқа толмаған пайдаланушылардың деректерін заңсыз жинап, оған ата-аналарының келісімін алмаған деп айыпталды. Бұл интернеттегі балалардың құпиялылығын қорғау туралы COPPA заңына қатысты. Ол балаларға бағытталған онлайн-сервистерді 13 жасқа толмаған пайдаланушылардың жеке ақпаратын жинамас бұрын ата-аналардың келісімін алуға міндеттейді.
«Біздің басымдығымыз – интернеттегі балаларды қорғау және олардың жеке деректері сеніп тапсырылған компаниялардың заңды міндеттемелерін орындауын қамтамасыз ету», — деді АҚШ Бас прокурорының орынбасары Стэнли Вудворд.
Келісім шарттары бойынша TikTok бірден 300 млн доллар төлейді. Тағы 100 млн долларды компания TikTok-тың ізашары Musical.ly-мен жасалған бұрынғы сот келісімі жойылғаннан кейін аударады. Бұл келісім АҚШ Федералдық сауда комиссиясының 2019 жылғы тергеуінен кейін пайда болды. Сол кезде Musical.ly балалардың деректерін ата-аналарының келісімінсіз жинады деп айыпталған болатын. Компания 5,7 млн доллар мөлшерінде айыппұл төледі. АҚШ Әділет министрлігі талап арыз берілген сәттен бастап TikTok-та меншік құрылымында, басқаруда және пайдаланушы деректерін қорғау жүйесінде елеулі өзгерістер болғанын атап өтті. Ведомство келісімнің америкалық отбасыларды қорғауды күшейтуге және ұзақ сот талқылауынан аулақ болуға мүмкіндік беретінін хабарлады. Бұған дейін, қаңтар айында, ByteDance АҚШ-та бақылау пакеті америкалық иелерге тиесілі болатын жеке бірлескен кәсіпорын құруға келіскен болатын.
Бұл пайдаланушы деректерін қосымша қорғауды қамтамасыз етіп, TikTok-тың елде тыйым салудан аулақ болуына көмектесуі тиіс.
