Шығыс Қазақстан облысында полиция жол жұмыстары жүргізіліп жатқан учаскеде адам қаза тапқаннан кейін сотқа дейінгі тергеуді бастады. Апат Тарғын ауылының жанында болған, деп хабарлайды Sayasatlive.kz.
Куәгерлердің ақпаратына сәйкес, оқиға жөнделіп жатқан жол учаскесінде жұмыс техникасының қатысуымен болған. Салдарынан бір адам қаза тапты. ШҚО полиция департаменті оқиғаның болғанын растады. Қылмыстық іс ҚР ҚК 277-бабының 2-бөлігі бойынша тергелуде — тау-кен немесе құрылыс жұмыстарын жүргізу кезінде қауіпсіздік ережелерін бұзу, абайсызда адам өліміне әкеп соққан әрекет.
Баптың санкциясы алты жылға дейінгі мерзімге бас бостандығынан айыруды көздейді.
«Қазіргі уақытта қажетті тергеу әрекеттері жүргізілуде. ҚР ҚПК 201-бабының талаптарына сәйкес өзге ақпарат жария етуге жатпайды», — деп хабарлады ШҚО ПД баспасөз қызметі.
