Жөндеуден кейін Арқалық теміржол вокзалы ашылды. Ашылу салтанатына көлік министрінің орынбасары Жәнібек Тайжанов пен облыс әкімі Құмар Ақсақалов қатысты. Жұмыстар көлік инфрақұрылымын дамыту бағдарламасы аясында жүргізілді, деп хабарлайды Sayasatlive.kz ҚР Көлік министрлігінің баспасөз қызметіне сілтеме жасап.
Қайта құру барысында үш қабатты ғимараттың ауданы 680 шаршы метрге ұлғайып, 2,5 мың шаршы метрден асты. Құрылысшылар шатырды, қасбетті және ішкі үй-жайларды жөндеп, инженерлік желілерді, жылыту, желдету, сумен жабдықтау, кәріз және байланыс жүйелерін ауыстырды.
Қасбет фиброцемент панельдерімен қапталды, ал ішінде керамогранит және өртке қауіпсіз материалдар пайдаланылды. Вокзалда күту залдары, билет кассалары, ана мен бала бөлмелері жаңартылды, сондай-ақ мүмкіндігі шектеулі азаматтар үшін жағдай жасалып, аумақ абаттандырылды. Жаңа бейнебақылау, өрт дабылы және кіруді бақылау жүйелері орнатылды. Арқалықтағы вокзалды қайта құру алты станцияны қамтитын аймақтың теміржол объектілерін жаңарту бағдарламасына енді.
Қазіргі уақытта Арқалық, Аманқарағай, Құсмұрын және Железорудная станцияларында жұмыстар аяқталды. Қостанай мен Тобыл вокзалдарында жөндеу жұмыстары кесте бойынша жалғасуда.
