2025 жылдың жазында шыққан ChatGPT жаңартуынан кейін кейбір қолданушылар чат-боттан биологиялық қару, улы заттар жасау және патогендерді өзгертуге қатысты сұрауларға толық жауаптар ала алған. Бұл туралы Sayasatlive.kz The Wall Street Journal-ға сілтеме жасап хабарлайды.
Басылымның мәліметінше, 2026 жылдың басында қолданушылар модельге патогенді микроорганизмдерді тарату тәсілдері, вирустарды өзгерту және жоғары улы заттарды жасау туралы сұрақтар қойған. Газеттің айтуынша, бірқатар жағдайда ChatGPT қадамдық жауаптар берген. The Wall Street Journal OpenAI қызметкерлеріне сілтеме жасай отырып жазғандай, жекелеген түсініктемелер соншалықты қарапайым тілмен баяндалған, оны тіпті биологияны оқитын орта мектеп оқушысы да түсіне алған. Модельдің кейбір жауаптарын талдаған сарапшылар оларды «қауіпті дәл» деп сипаттады.
Мәселе анықталғаннан кейін OpenAI биологиялық қару мен уларды жасауға қызығушылық танытқан қолданушылардың есептік жазбаларын бұғаттады. Бұл ретте, басылымның ақпараты бойынша, мұндай сұраулар құқық қорғау органдары тарапынан ешқандай реакция тудырмаған. The Wall Street Journal сонымен қатар АҚШ-та жасанды интеллект жүйелерін әзірлеушілерді мұндай сұрауларды шектеуге немесе олар туралы мәліметтерді билікке беруге міндеттейтін федералды заңдар жоқ екенін атап өтеді.
Газет ЖИ әзірлеушілері тілдік модельдердің мүмкіндіктерін кеңейту мен оларды қауіпті мақсаттарда қолданудың алдын алу арасындағы теңдестікті іздеуді жалғастырып жатқанын атап көрсетеді.
