Қазақстанда ауыр науқастар мен оталардан кейін қалпына келтіру арнайы орталықтарда ғана емес, ТМККК және МӘМС шеңберінде тіркелген емханаларда да қолжетімді, деп хабарлайды Sayasatlive.kz.
Алматы қалалық №16 емханасының оңалту және қалпына келтіру емі орталығының меңгерушісі Назерке Ұлдақанованың айтуынша, учаскелік дәрігердің жолдамасы бойынша пациенттер емдік дене шынықтыру, физиотерапия және басқа да оңалту әдістерін қамтитын қалпына келтіру емі курсынан өте алады. Бағдарлама әр пациенттің диагнозын, денсаулық жағдайын және қажеттіліктерін ескере отырып, жеке таңдалады. Ол басты мақсат — адамға жоғалтқан функцияларын қалпына келтіруге, қозғалғыштығын қайтаруға, дербестігін арттыруға және өмір сапасын жақсартуға көмектесу екенін хабарлады.
Қазақстанда медициналық оңалту кезең-кезеңімен жүзеге асырылады:
бірінші кезең — аурудың жедел ағысы кезеңінде (72 сағатқа дейін), жедел араласулар мен жарақаттар кезінде (стационар деңгейінде) жүргізіледі;
екінші кезең — аурудан немесе жарақаттан кейін қалпына келтіру кезеңінде (алғашқы алты ай ішінде), сондай-ақ аурудың қалдық көріністері кезеңінде жүргізіледі;
үшінші кезең — амбулаториялық-емханалық ұйымдарда, күндізгі және тәулік бойы жұмыс істейтін стационарларда, оңалту орталықтарында, санаторий-курорттық ұйымдарда жүргізіледі.
Ұлдақанова 2026 жылдың бірінші жартыжылдығында Алматыда 11 555 пациент медициналық оңалту курсынан өткенін атап өтті. Оның ішінде 5 412 адам оңалтудың екінші кезеңінде, 6 143 адам үшінші кезеңінде көмек алды.
«Егер сіз немесе жақындарыңыз қалпына келтіру еміне мұқтаж болса, медициналық оңалтудың көрсетілген-көрсетілмегенін және оны қалай өтуге болатынын білу үшін учаскелік дәрігеріңізге хабарласыңыз», — деді дәрігер.
