Екатеринбургте Wildberries логистикалық орталығының жанындағы автотұрақта ұшқышсыз аппараттардың сынықтары құлағаннан кейін өрт шықты. Өрт шамамен 300 шаршы метр аумақты шарпыды, деп хабарлайды Sayasatlive.kz.
Свердлов облысының губернаторы Денис Паслердің айтуынша, шабуыл салдарынан инфрақұрылым және экономика нысандары зардап шеккен жоқ. Wildberries логистикалық кешені де зақымданбаған.
«Екатеринбургтегі компанияның логистикалық нысанында қауіпсіздік талаптарына сәйкес алдын ала жоспарлы көшіру жүргізілді. Осы сәтте логистикалық нысанның жұмысы уақытша тоқтатылды», — деп хабарлады RWB баспасөз қызметі.
Компания жақын арада қалыпты режимге оралуды жоспарлап отырғанын мәлімдеді. Соңғы апталарда Wildberries нысандары Ресейдің түрлі аймақтарында ұшқышсыз аппараттардың шабуылдарының нысанасы болды.
