Белгілі мемлекеттік қызметкер Ерболат Досаев «Самұрық-Қазына» ұлттық әл-ауқат қорының Директорлар кеңесі құрамынан шықты, деп хабарлайды Sayasatlive.kz.
Қор өкілдерінің түсіндіруінше, бұл — таза процедуралық мәселе. Үкімет қаулысына сәйкес, Президент Әкімшілігі басшысының орынбасары лауазымын атқаратын тұлға автоматты түрде «Самұрық-Қазына» кеңесіне мүше болады.
Алайда, биылғы жылдың 25 наурызында Мемлекет басшысының жарлығымен Ерболат Досаев Президент Әкімшілігі басшысының орынбасары қызметінен босатылған болатын. Осыған байланысты оның қордағы өкілеттігі де тоқтатылды.
«Президенттің 2026 жылғы 25 наурыздағы жарлығына сәйкес, Досаев Ерболат Асқарбекұлы Президент Әкімшілігі басшысының орынбасары лауазымынан босатылды, соған сәйкес оның «Самұрық-Қазына» АҚ Директорлар кеңесінің мүшесі ретіндегі өкілеттігі тоқтатылды», — делінген ресми хабарламада.
Айта кетейік, Ерболат Досаев бұл лауазымда бар болғаны жарты жыл жұмыс істеді. Ол қордың Директорлар кеңесіне өткен жылдың желтоқсанында кірген болатын.
Ерболат Досаев — Қазақстанның мемлекеттік басқару жүйесіндегі ең танымал тұлғалардың бірі. Оның мансабы қаржы, экономика және өңірлік басқару салаларын қамтиды.
Әр жылдары Қаржы министрі, Денсаулық сақтау министрі, Экономикалық даму және сауда министрі, сондай-ақ Ұлттық экономика министрі қызметтерін атқарды. Ұлттық банк төрағасы болып жұмыс істеді және «Байтерек» холдингін басқарды. Президент Әкімшілігіне келгенге дейін ол Алматы қаласының әкімі болды.
Досаевтың Президент Әкімшілігінен кетуі және ірі холдингтердің кеңесінен шығарылуы оның алдағы уақытта басқа жауапты қызметке тағайындалуымен немесе жұмыс бағытының өзгеруімен байланысты болуы мүмкін. Қазірше оның жаңа қызметі туралы ресми ақпарат жоқ.
