Туризм және спорт министрлігінде жаз айларында ұйымдастырылатын ауқымды турнирлерге дайындық мәселелері талқыланды, деп хабарлайды sayasatlive.kz ведомствоның баспасөз қызметіне сілтеме жасап.
Астана, Түркістан, Шымкент және Ақтауда өтетін халықаралық турнирлерді ұйымдастыру мәселесі арнайы кеңесте қаралды. Министрлік өкілдері тек жарыс өткізуді емес, спортшылардың қауіпсіздігі мен шетелдік делегацияларды лайықты күтіп алу жағын да жіті тексеріп жатыр. Инфрақұрылым мен логистикадан бөлек, медициналық көмек көрсету сапасы да басты назарда болмақ.
Жазғы жарыстардың кестесі де өте тығыз. Мәселен, елордада боччадан Әлем кубогі өтіп, оған 25 елден үміткерлер жиналады. Ал Азия чемпионатында 350-ден астам ескекші байдарка мен каноэде есуден үздікті анықтайды. Тізім мұнымен бітпейді: мың жарымнан астам таеквондошы, Ғұсман Қосанов мемориалына қатысатын жеңіл атлеттер мен кураштан әлем біріншілігіне келетін 50 елдің балуандары боз кілемде белдеспек. Сондай-ақ WKF каратэден өтетін Орталық Азия чемпионатына 700-ге жуық спортшы қатысуды жоспарлап отыр.
Туризм және спорт министрінің орынбасары Серік Жарасбаев бұл додалардың еліміз үшін маңызы зор екенін айтты. Оның сөзінше, мұндай шаралар Қазақстанның спорт аренасындағы беделін бекітіп қана қоймай, бұқаралық спорттың дамуына үлкен септігін тигізеді.
Кездесу қорытындысы бойынша жауапты мемлекеттік органдарға, федерацияларға және жарыс ұйымдастырушыларына алдағы халықаралық додаларға сапалы әрі уақтылы дайындықты қамтамасыз ету жөнінде нақты тапсырмалар берілді.
