Алматыда Alemcredit.com интернет-ресурсы арқылы азаматтарға криптовалютамен шағын қарыз беру сылтауымен алаяқтық фактісі тергеліп жатыр, деп хабарлайды Sayasatlive.kz ҚР ҚМА-ға сілтеме жасап.
Тергеу деректеріне сәйкес, әлеуетті қарыз алушыларды әлеуметтік желілер арқылы тиімді шарттармен қарызды жарнамалап, белсенді түрде тартқан. Рәсімдеу үшін клиенттерге сәйкестендіруден өту, жеке деректерді ұсыну және электронды құжаттарға қол қою ұсынылған.
«Алайда, көрсетілген рәсімдер аяқталғаннан кейін мәміленің нақты шарттары мәлімделгеннен айтарлықтай ерекшеленген. Қарыз алушыларға бастапқыда көрсетілгеннен әлдеқайда аз сома аударылған, қаражаттың бір бөлігі комиссиялар мен алдын ала хабарланбаған басқа да төлемдер ретінде ұсталған», — делінген хабарламада.
Ведомство сондай-ақ мәміле жасалғанға дейін клиенттерге қарыздың толық құны, артық төлем мөлшері, сыйақы және ықтимал айыппұл санкциялары туралы ақпарат толық көлемде ашылмағанын хабарлады. Тергеу деректеріне сәйкес, қаражатты қайтару үшін үшінші тұлғалардың – «дропперлер» деп аталатындардың банк карталары пайдаланылған. Интернет-ресурс жұмысы үшін заңды тұлғаларды, телекоммуникациялық ресурстарды және техникалық құралдарды қамтитын кең тармақталған инфрақұрылым қолданылған.
Тінту барысында құқық қорғаушылар SIM-бокстарды және көптеген SIM-карталарды тәркіледі, олар тергеу нұсқасы бойынша жаппай SMS-хабарламалар жіберу үшін қолданылған. Тергеу жалғасуда.
