«Бернли» жеңіліс сериясын тоқтатты: Дастан Сатпаев 80 минут ойнады

Англия Чемпионшипының төртінші турының матчында «Бернли» «Мидлсбромен» тең түсті. «Терф Мур» стадионындағы кездесу 1:1 есебімен аяқталды. Дастан Сатпаев негізгі құрамда шығып, 81-минутта ауыстырылды,  деп хабарлайды Sayasatlive.kz.

Эйдан Моррис Себастьян Берхалтердің пасынан кейін «Мидлсброның» шабуылын аяқтады. «Бернли» үзілістен кейін жауап бере алды: 54-минутта Уго Рагубер Зеки Амдунидің пасынан кейін есепті теңестірді.

Екінші таймның басты сәттерінің бірі Сатпаев қатысқан эпизод болды. «Бернлидің» өткір қарсы шабуылынан кейін қазақстандық өз командасын алға шығаруға мүмкіндік алды, алайда оның соққысын «Мидлсбро» қақпашысы Радек Витек қайтарды.

Төрт турдан кейін «Бернли» екі ұпаймен Чемпионшиптің турнир кестесінде 23-орынды иеленді. 10 ұпай жинаған «Суонси Сити» көш бастап тұр. «Куинз Парк Рейнджерс» пен «Чарльтонда» да осынша ұпай бар, алайда валлиялық клуб қосымша көрсеткіштер бойынша бәсекелестерінен озып тұр.