Қаржы мониторингі агенттігі (ҚМА) міндетті әлеуметтік медициналық сақтандыру (МӘМС) жүйесінен 3,5 млрд теңге жымқыруды анықтады, деп хабарлайды Sayasatlive.kz.
ҚМА МӘМС саласындағы алаяқтық фактілері бойынша 36 қылмыстық істі тергеп жатыр. Мемлекетке келтірілген жалпы зиян 3,5 млрд теңгеден асты. Тергеу 140 мыңға жуық азаматты медициналық ұйымдарға жалған тіркеу, сондай-ақ Әлеуметтік медициналық сақтандыру қорынан заңсыз төлемдер алу үшін көрсетілген медициналық қызметтер туралы жалған мәліметтер енгізу схемаларын анықтады.
Түркістан облысындағы аурухана 501 млн теңгені жымқырды деген күдікке ілінді. Тергеулердің бірі Жетісай көпбейінді аудандық ауруханасының лауазымды тұлғаларына қатысты. Тергеу нұсқасы бойынша, МӘМС қаражаты 20-дан астам жеке кәсіпкердің шотына қызметтерді нақты көрсетпей және тауарларды жеткізбей аударылған. Бұл ретте кәсіпкерлердің өздері медициналық мекемемен шарт жасаспаған, ал олардың банк деректемелері ақшаны шығару және кейіннен қолма-қол ақшаға айналдыру үшін пайдаланылған.
Алдын ала деректер бойынша, мемлекетке келтірілген зиян 501 млн теңгеден асты. Екі күдікті қамауға алынды. Клиника басшылары сотталды. ҚМА елордалық Forte Clinic жеке клиникасының басшысы МӘМС қорынан заңсыз қаржы алу схемасын ұйымдастырғаны үшін бес жылға бас бостандығынан айырылғанын хабарлады. Оның сыбайласы — Денсаулық сақтауды дамыту ұлттық ғылыми орталығының қызметкері — азаматтарды тіркеуге арналған өтінімдерді заңсыз мақұлдағаны үшін үш жылға бас бостандығынан айырылды.
«Тергеу деректері бойынша, клиникаға 15 мыңнан астам адам жалған тіркеліп, Damu Med жүйесі арқылы 79 млн теңге сомасына көрсетілмеген медициналық қызметтер ресімделген», — делінген хабарламада.
Тағы бір іс Алматы облысында қаралды. Mydental.kz және «Стоматология Dr.Nurzhanova» клиникаларының басшысы стоматологиялық қызметтер көрсету кезіндегі алаяқтық үшін мүлкін тәркілеумен төрт жылға бас бостандығынан айырылды. Тергеу медициналық көмекті жалған көрсетудің 4,5 мыңнан астам жағдайын анықтады. Ресімдеу үшін дәрігерлердің есептік жазбалары мен кәмелетке толмаған пациенттердің жеке деректері пайдаланылған. Мемлекетке келтірілген зиян 66 млн теңгеге бағаланды. ҚМА мұндай схемаларды анықтау жұмысы жалғасып жатқанын атап өтті.
