Қазақстан үкіметі ет пен нан бағасын ұстап тұру шараларын қолданды, деп хабарлайды Sayasatlive.kz.
Қазақстанда жыл басынан бері алғаш рет азық-түлік бағасының төмендеуі тіркелді. Шілде айының үш аптасының қорытындысы бойынша әлеуметтік маңызы бар азық-түлік тауарларының орташа баға индексінің -0,1%-ға төмендеуі ағымдағы жылдың басынан бері алғаш рет тіркелді.
Бұл деректер премьер-министрдің орынбасары – ұлттық экономика министрі Серік Жұманғариннің төрағалығымен өткен әлеуметтік маңызы бар азық-түлік тауарларының бағасын тұрақтандыру және инфляция мәселелері жөніндегі кеңесте айтылды. Маусым айының қорытындысы бойынша елдегі жылдық инфляция 10,3% құрады, мамыр айында бұл көрсеткіш 10,4% болған еді. Жылдық инфляция деңгейі республикалық орташа көрсеткіштен жоғары 11 аймақта тіркелді.
Ең жоғары көрсеткіштер Жетісу, Ұлытау облыстарында, сондай-ақ Солтүстік Қазақстан және Ақмола аймақтарында тіркелді. Сауда және интеграция бірінші вице-министрі Айжан Бижанованың айтуынша, шілде және тамыз айлары дәстүрлі түрде негізгі азық-түлік өнімдері бағасының маусымдық тұрақтану кезеңі. Соңғы аптада қызанақ 15,1%-ға, қияр 18,2%-ға, сәбіз 5,2%-ға және жұмыртқа 2,4%-ға арзандады. Сонымен қатар, ет өнімдерінің жекелеген түрлерінің бағасы өсуде: қой еті – 2%, жылқы еті – 1,3% және тартылған ет – 0,6%. Осыған байланысты Серік Жұманғарин үкіметтің одан әрі іс-қимылдарын анықтау үшін ет және ет өнімдерін өндіру нарығына өндіріс көлемін, ішкі тұтынуды және экспорттық жеткізілімдерді ескере отырып, егжей-тегжейлі талдау жүргізуді тапсырды. «Бағаны одан әрі тұрақтандырудың негізгі факторларының бірі ішкі өндірісті ұлғайту және отандық өндірушілерді мемлекеттік қолдау шараларын кеңейту болады.
Жыл соңына дейін өсімдік майларын тазарту бойынша үш зауытты іске қосу жоспарлануда, бұл ішкі нарықта күнбағыс майының ұсынысын арттыруға мүмкіндік береді», — делінген хабарламада. Жақын арада нан пісіру саласындағы 40 кәсіпорын үшін электр энергиясына жеңілдікті тарифтерді көздейтін нормативтік құқықтық акт күшіне енетіні атап өтілді. Бұл шара өндірістік шығындарды азайтуға мүмкіндік береді және нан-тоқаш өнімдерінің тұрақты бағасын сақтауға ықпал етеді. Сонымен қатар, «Қазақстан темір жолы» ҰК» АҚ ел ішінде әлеуметтік маңызы бар азық-түлік тауарларын теміржол арқылы тасымалдауға 70% жеңілдік береді. Жергілікті атқарушы органдарға мұндай тасымалдарға мониторингті және осы қолдау шарасын алушылардың бағаның негізсіз өсуіне жол бермеу жөніндегі қарсы міндеттемелерді орындауын бақылауды қамтамасыз ету тапсырылды.
Кеңесті қорытындылай келе, Серік Жұманғарин мемлекеттік органдар мен әкімдіктерге нарық қатысушыларымен атаулы жұмысты күшейтуді тапсырды. «Бағаның айтарлықтай өсуінің әрбір жағдайы бойынша жеткізу тізбегін толық талдап, қымбаттау себептерін жою қажет. Бейінді министрліктер мен әкімдіктерге ірі көтерме өнім берушілермен және импорттаушылармен кездесулер өткізіп, қолданыстағы кедергілерді анықтауды және баға тұрақтылығын қамтамасыз ету бойынша олардың қарсы міндеттемелерді міндетті түрде қабылдауы кезінде қажетті мемлекеттік қолдау шараларын әзірлеуді тапсырамын. Осындай жүйелі жұмысты азық-түлік емес тауарлар мен ақылы қызметтерге қатысты да, тиісті нарықтардың ерекшеліктерін ескере отырып ұйымдастыру қажет. Әрбір мемлекеттік орган өз құзыреті шегінде шаралардың іске асырылуын қамтамасыз етуі тиіс», — деді Серік Жұманғарин.
