АҚШ Сауда өкілінің кеңсесі (USTR) Қазақстаннан келетін өнімдердің жекелеген түрлеріне 12,5% мөлшерінде қосымша баж салығын енгізгенін жариялады, деп хабарлайды Sayasatlive.kz.
Шешім АҚШ-тың 1974 жылғы Сауда туралы заңының 301-бабы аясындағы тергеу қорытындысы бойынша қабылданды. USTR хабарлағандай, шешім қабылдау кезінде тергеу нәтижелері, жұртшылық өкілдерінің өтініштері, куәгерлердің айғақтары, 301-бап бойынша комитеттің ұсынымдары және консультативтік органдардың тұжырымдары ескерілді. Бұл шара АҚШ президентінің арнайы тапсырмасына сәйкес енгізілді. Американдық ведомствоның мәліметінше, тергеулер бірқатар сауда тәжірибелері мен шетелдік экономикалардың әрекеттері жауап шараларын талап ететінін көрсетті. Атап айтқанда, АҚШ жаңа тарифтерді мәжбүрлі еңбекті пайдалану арқылы өндірілген өнімдерді жеткізуді болдырмау мәселелерімен байланыстырды.
USTR барлығы 60 тергеуді аяқтап, анықталған тәжірибелердің 301-баптың әрекетіне жатады деген қорытындыға келді. Жаңа баж салығының мөлшері нақты елдегі жағдайға байланысты болады. Мәжбүрлі еңбекпен байланысты тауарлардың импортына тыйым салған немесе сауда келісімдері аясында мұны істеуге міндеттенген экономикалар үшін базалық ставка 10% құрайды. Қалған жағдайлар үшін 12,5% ставка қарастырылған. Кейбір тауарлар үшін қосымша баж салығының мөлшері ең қолайлы режимнің (ЕҚР) қолданыстағы ставкасын ескере отырып түзетілуі мүмкін. Бангладеш, Камбоджа, Индонезия және Малайзия үшін жекелеген шарттар белгіленген.
АҚШ бұл елдерге американдық мақта мен тоқыма шикізатын жеткізуді ынталандыру және мәжбүрлі еңбекті пайдаланумен байланысты болуы мүмкін өнімдерге тәуелділікті азайту үшін тарифтік квоталарды пайдалануды жоспарлап отыр. Жаңа тарифтер 2026 жылғы 24 шілдеден кейін, шығыс уақыты бойынша 00:01-ден кейін АҚШ-қа әкелінген немесе ішкі тұтыну үшін қоймалардан шығарылған тауарларға қолданылады. Жолда болған жүктер үшін өтпелі кезең қарастырылған — олар 2026 жылғы 28 шілдеге дейін, шығыс уақыты бойынша 00:01-ге дейін ресімделген жағдайда жаңа шаралардан босатылады. Бұған дейін АҚШ президенті Дональд Трамп осы аптада ондаған елге қатысты жаңа импорттық баж салығын енгізу мүмкіндігін қарастырып жатқаны хабарланған болатын.
Financial Times хабарлағандай, АҚШ әкімшілігі қолданыстағы 10 пайыздық жаһандық тарифтерді 10%-дан 12,5%-ға дейінгі жаңа ставкалармен алмастыруға ниетті, бұл шамамен 60 мемлекетке әсер етуі мүмкін.
